Сумын төвд 75 хүүхдийн багтаамжтай цэцэрлэг 2020 онд ашиглалтад орж, 2-6 насны хүүхдэд сургуулийн өмнөх боловсролыг 100 хувь олгон ажиллаж байна. Ерөнхий боловсролын сургууль нь 24 багш ажилтантай 165 сурагчтай,  бага ангийн заах аргын нэгдэл, дунд ангийн заах аргын нэгдэл, захиргаа аж ахуйн баг гэсэн зохион байгуулалттай ажиллаж байна. Сургуулийн дотуур байр нь 60 хүүхдийн багтаамжтай бөгөөд малчдын 40 хүүхэд амьдарч байна. Ерөнхий боловсролын сургууль нь сумын орон нутгийн хөгжлийн сангийн хөрөнгөөр спорт заал, урлаг танхим, номын сан зэрэг хичээл сургалт зохион байгуулах таатай орчин бүрдүүлж байна. Хүүхдийн сурах орчин нөхцөлийг бүрдүүлсэнээр сургуулийн өмнөх боловсролын анги дүүргэлт 80 хувь, Ерөнхий боловсролын сургуулийн анги дүүргэлт 70 хувь болж аймаг, хотоос анги дүүргэлт 20 хувиар бага, багш нарын нарийн мэдлэг ур чадварын үнэлгээ аймагтаа дээгүүр үзүүлэлтэд хүрсэн үр дүн гарсан. Хүүхэд сурч хөгжих таатай нөхцөлийг бүрдүүлэх бодлого хэрэгжиж байна.

Тус сумын хэмжээнд боловсролын чиглэлээр 2021 оноос эхлэн НОМ хөтөлбөр хэрэгжиж, хөтөлбөрийн хүрээнд Ерөнхий боловсролын сургууль, Хүүхдийн цэцэрлэг номын өргөө байгуулсан. Мөн "Хүүхдэд ээлтэй орон нутаг" хөтөлбөрийн хүрээнд төсөвт байгууллагууд ХҮҮХДИЙН ӨРӨӨ-тэй болж, төрийн албан хаагчид ажиллах, хүүхдүүд сурч хөгжих таатай орчинг бүрдүүлсэн. Мөн орон нутгаа хүүхэд наснаасаа мэдэх нөхцөл боломжийг бүрдүүлж, Хүүхдийн цэцэрлэг Сэнжит хадыг бүтээсэн.