Алтанширээ сум нь Улаанбаатар хотоос 450 км, аймгийн төвөөс зүүн хойш 90 км зайтай байрладаг. Эрс тэс уур амьсгалтай, 734,8 м2 газар нутагтай, говь хээрийн бүс нутагтай.

Манай сумын нутаг дэвсгэр алт, хайлуур жонш, төмрийн хүдэр, ягаан гантиг, зэс, шохойн чулуу, өнгөт чулуу, нүүрс, өнгө өнгийн шороо будгийн тогтоц, цэвэр усны нөөц ихтэй. Мөн түүхий эд боловсруулах буюу газрын тос боловсруулах үйлдвэрийн бүтээн байгуулалтын ажил өрнөж, сумын болон аймгийн иргэдийг ажлын байраар хангах боломжтой. Монгол Улсын нүүрсний 70-80 хувийг хүрэн нүүрс эзэлдэг. Харин тус суманд хүрэн нүүрсний томоохон орд тогтоогдсон бөгөөд тус ордуудыг түшиглэсэн 2 цахилгаан станц 2020-2024 онд шинээр баригдахаар Засгийн газрын үйл ажиллагааны хөтөлбөрт тусгагдсан.

Алтанширээ сумын малчдын санаачилгаар 2016 онд “Олон ширээ” хоршоо байгуулагдаж, сумын хэмжээнд 8 нэрийн хүнсний дэлгүүр ажиллуулах, ноолуур худалдан авах, малын үйлдвэр угсааг сайжруулах зэрэг ажлуудыг тогтмол хийж байна. Мөн махны үйлдвэр байгуулах ажлыг эхлүүлэн, 2024 оны 10 сард ашиглалтад орж  20-30 ажлын байр шинээр бий болно.

Тус сум нь 2023 оны байдлаар 1315 хүн амтай тул хүн амын нягтрал жигд суурьшилттай түвшинд байна. Иймээс сум орон нутагт амьдарч байгаа иргэдийн хувьд тав тухтай, эрүүл, аюулгүй орчин нөхцөлд амьдрах боломжтой.

Алтанширээ сумын нутаг дэвсгэрийн хөгжлийн төлөвлөгөөний дагуу сумын нутаг дэвсгэрийн дийлэнх хувь нь тэгш гадаргатай, хөдөө аж ахуйн газар эзэлдэг тул ихэнх газрыг хөдөө аж ахуй, газар тариалан эрхлэлтийн чиглэлээр ашиглах боломжтой.

Мөн сумын нутаг дэвсгэрт “Сайн-Ус” хэмээх ундрага ихтэй, задгай устай тул газар тариалан эрхлэлтийн тулгамдаж буй усны асуудлыг шийдвэрлэсэн.

Тус суманд уул уурхайн 16 хайгуул, 11 ашиглалтын тусгай зөвшөөрөлтэй компани үйл ажиллагаа явуулдаг. Мөн Монгол газрын тос боловсруулах үйлдвэр, Эрдэнэцогтын хүрэн нүүрсний орд ашиглалтад орж, уг үйлдвэр, уурхайг түшиглэж сум орон нутагт бүтээн байгуулалт нэмэгдэх, хүн амын тоо өсөх, эдийн засгийн эргэлт нэмэгдэх тул түүхий эдийн баялагыг боловсруулах замаар хөгжих боломжтой. Энэхүү хөгжлийн дагуу сум нь 2050 он гэхэд 20-30 мянган хүн амтай хот болох бүрэн боломжтой.